#مبادرة-#استفيد-#بوقتك
الوقاية خير من العلاج
زى ما اتفقنا ان التغذية السليمة والصحيحة كلنا محتاجينها من أجل صحة جيدة و جهاز مناعى قادر على مواجهة الكثير من الميكروبات والفيروسات. المرة السابقة اتكلمنا عن فيتامين سى و فيتامين أ.
انهاردة هانتكلم عن المشروبات اللى ليها دور فى تقوية المناعة.
معانا انهاردة د. ايمان زكريا أستاذ مساعد الفارماكولوجيا الإكلينيكية واخصائى التغذية العلاجية كلية الطب جامعة قناة السويس.
مشروب الحليب الذهبي Golden milk
سؤال: عباره عن ايه المشروب ده؟
جواب: عباره عن كوبايه حليب و عليها كركم فبيدي لون دهبي عشان كده اسمه Golden milk.
سؤال: هو ايه علاقته بالمناعة؟
جواب: ده ليه علاقه مهمه جدا.
1. اولا كوب الحليب بيمدنا ب 8 جرام من البروتين. ده هو مصدر مهم للبروتين و اتكلمنا قبل كده ان جسمنا بيستخدم البروتين في تكوين الاجسام المضاده البيدافع بها عن نفسه. ده كمان بخلاف اهميه البروتين في معظم وظائف الجسم.
2. ثانيا الحليب مصدر مهم للكالسيوم عشان وظائف الجسم و العظام.
3. ثالثا الحليب كامل الدسم او قليل الدسم (و نبعد عن المنزوع) فيه الفيتامينات المذابه في الدهون زي فيتامين د و غيره. و اكيد قريتوا كتير عن فيتامين د لان عليه ابحاث كثيره عن اهميته في الوقايه من امراض كثير ( ده حتى مدخلينه في علاج الاكتئاب).
4. نيجي بقه لمعلقه الكركم البنحطها عليه. و الكركم عباره عن اعشاب بيحتوي على ماده الكركمين و ده بقه حدث و لا حرج. كفايه علينا النهارده نعرف انها محفزه للمناعه و بتقلل الالتهابات.
5 ممكن نحلي المشروب ده بقه بمعلقه عسل نحل بس منكترش (هو اه العسل مفيد لكن زيه زي السكر الابيض بيرفع مستوى السكر فى الدم).
6. ممكن نزود رشه قرفه او جنزبيل هيدي طعم و كمان محفز للمناعة.
7. كمان المشروب ده ساخن فبيزيل العوالق الموجوده و كمان مذيب للبلغم. ده بخلاف اننا بنحسبه من ضمن كمية السوائل المطلوب نشربها يوميا.
طريقه التحضير:
1. كوب حليب كامل الدسم .
2. ملعقه صغيره كركم مطحون.
3. رشه فلفل اسود مطحون( مهم عشان بيحسن امتصاص الكركم).
4. رشه قرفه او جنزبيل.
5. ملعقه صغيرة عسل نحل حسب الرغبه.
6. هنغلي الحليب و نقلب فيه الباقي و بالف هنا.
#مبادرة-#استفيد-#بوقتك
مع تحيات
وحدة التحول الرقمى وتكنولوجيا المعلومات
كلية الطب-جامعة قناة السويس
