#مبادرة-#استفيد-#بوقتك
عناصر التحول الرقمى Elements of Digital Transformation””
يا ترى امتى نقول أن رحلة “التحول الرقمى” أدت الى الفوائد المرجوة منها، يعنى امتى نقول أن المؤسسة الى بدأت تطبق رحلة التحول الرقمى بقى ليها وجود رقمى مقنع وناجح. نقدر نحدد ده ببساطة لو عرفنا عناصر التحول الرقمى الناجح.
ما هى عناصر التحول الرقمى الناجح؟
للتحول الرقمى الناجح 5 عناصر أساسية:
1. استراتيجية الأعمال الرقمية:
يعنى لازم يكون للمؤسسة ( وهانسميها المؤسسة الرقمية) الى بتطبق سياسات التحول الرقمى استراتيجية رقمية واضحة لطريقة سير العمل بها، أى أن هذه المؤسسة أصبح ليها نظام رقمى متكامل. وطبعا ده مش هايتم غير لما المؤسسة يبقى ليها خطة استراتيجية رقمية واضحة ومعلنة مش بس داخل المؤسسة لا ده كمان لجميع الأطراف المستفيدة من هذه المؤسسة.
2. الأرتباط بالمستفيدين:
المؤسسة الرقمية الناجحة لازم تنشئ عدد من الطرق الفعالة للتواصل مع المستفيدين، ما معناه ان لازم هذه المؤسسة يكون ليها حضور رقمى. على فكرة طرق التواصل مش بس موقع الكترونى مفعل ومحدث، أو ليها بريد إلكتروني مفعل (يعنى فى رد متبادل لو أرسلت على هذا الأيميل). و هنا يظهر بقوة دور منصات التواصل الاجتماعى بأنواعها من خلال الفيسبوك، تويتر، نظام الدردشة على شبكة الإنترنت، قنوات اليوتيوب، و نماذج الاتصال والدردشة التي تعمل بالذكاء الاصطناعي
” Artificial Intelligence on communication networks and services. ”
3. ثقافة الابداع:
على فكرة لغاية هنا والمؤسسة ممكن تكون مؤسسة رقمية غير ناجحة. لأن فى اللحظة دى المؤسسة محتاجة لأكثر من مجرد إنشاء قنوات الاتصال. دى محتاجة عاملين و موظفين مدربين على التواصل بشكل احترافي وفعال مع العملاء. مش بس كده لا دى محتاجة تنمية القدرات الابداعية لهؤلاء العاملين و الموظفين.
4. التقنية:
دى أعتقد سهل نعرفها وهى التكنولوجيا. على فكرة ممكن بعض الأفراد يفهمها أن عنده كمبيوتر على مكتبه، أو ان عنده انترنت فى المكان اللى بيشتغل فيه. الموضوع أكبر من كده على فكرة.
الأول محتاجين نعرف التقنية أو التكنولوجيا: هى كلمة أعجمية ذات أصل يوناني، تتكوّن من مقطعين، كلمة “تكنو” والتي تعني حرفة أو مهارة أو فن، وكلمة “لوجي” التي تعني علم أو دراسة. وبالتالى كلمة “تكنولوجيا” هى مجموع التقنيات والمهارات والأساليب والعمليات المستخدمة في إنتاج البضائع أو الخدمات أو في تحقيق الأهداف، اختصارا هى بمعنى “علم الأداء” أو “علم التّطبيق” .
بعد التعريف ده نقدر نبلور قيمة التقنية كعنصر من عناصر التحول الرقمى حيث أنها تطوير واستخدام الأدوات الأساسية تقليل الحواجز المادية التي تعترض التواصل وبالتالى تسمح للبشر بالتفاعل بحرية على نطاق عالمي.
5. البيانات والتحليل:
وهنا بيظهر قوة التكنولوجيا الرقمية للمؤسسات للوصول إلى معلومات بالغة الأهمية كسلوكيات المستفيدين، و شرائح العملاء، ومؤشرات أداء كمية للمؤسسة يمكن بها انتاج احصائيات لهذه النتائج. وده هاينتج عنه تحسين أداء المؤسسة وتحسين جذب المستفيدين. مش بس كده، ده كمان هايدعم القادة والإدارة فى اتخاذ القرارات و فى تنفيذ اجراءات تصحيحية لضمان استمرارية العمل بهذه المؤسسة وبالتالى نجاح هذه المؤسسة الى ماننساش هى الآن مؤسسة رقمية ناجحة.
مع نهاية هذا البوست نقدر نقول ان مفهوم التحول الرقمى والعناصر الخاصة بالتحول الرقمى اصبحت مفهومة.
تابع معانا الرحلة فى البوست القادم واللى هانتكلم فيه عن فوائد تطبيق رحلة التحول الرقمى ان شاء الله.
لو حابب ترجع للبوست الخاص بمفوم التحول الرقمى ده اللينك الخاص به:
https://m.facebook.com/story.php?story_fbid=217052199710297&id=103673371048181
#مبادرة-#استفيد-#بوقتك
مع تحيات
د.سماح العايدى
مدير وحدة التحول الرقمى وتكنولوجيا المعلومات
كلية الطب- جامعة قناة السويس
